t Evengelie volgens Marcus 10
46 Ze kwammen in Jericho. Dou hai mit zien leerlingen weer tou stad oet ging, mit n haile koppel volk achter heur aan - wat gebeurde der dou? Dou zat ter n blinde man aan kaant van weg te bedeln! Bartimeüs was de noam, Timeüs zien zeun was e.
47 Dou e heurde dat t Jezus oet Nazaret was, begunde hai te bèlken: "Jezus, Zeun van David, heb toch meedlieden mit mie!"
48 t Volk graauwde hom tou: "Hol die toch stil!" Mor hai bèlkte nog haarder: "Zeun van David, heb toch meedlieden mit mie!"
49 Jezus bleef stoan en zee: "Roup hom hier op aan!" Mensken zeden tegen blinde: "Loat moudveren nait hangen! Tou, in t èn: hai ropt die!"
50 Man schoot zien jak oet, sprong in t èn en ging noar Jezus tou.
51 "Wat wil ie dat ik veur joe dou?" vruig Jezus. "Rabbi, weer zain kinnen!" antwoordde blinde man.
|